Хочуць адлічыць? Не ведаеш, як размеркавацца? Новы «Кодэкс аб адукацыі» наганяе на цябе жах? Спецыялісты юрыдычнай кансультацыі «Студэнцкай Рады» дапамогуць разабрацца ў гэтых пытаннях!

У жніўні «Студэнцкая Рада» запусціла праект юрыдычнай кансультацыі студэнтаў па іх правах. Праект стартаваў у пілотным рэжыме. Звярнуцца па дапамогу і тлумачэнне мог кожны жадаючы асабіста ці праз форму на сайце. Паслуга кансультантаў – бясплатная.

Якія праблемы вырашаюць юрысты

Праблемы, з якімі ідуць у «Студэнцкую Раду», звычайна звязаныя з адукацыяй у ВНУ. Вельмі хвалююць студэнтоту пытанні адлічэння, пераводу ў іншы ўнівер. Цікавяцца тым, як можна атрымаць льготы на адукацыю, як знізіць аплату. Часта звяртаюцца за каментарамі па новаму Кодэксу аб адукацыі. Важным пытаннем для маладзёнаў застаецца і размеркаванне.

За 2 месяцы працы па дапамогу звярнулася каля 40 чалавек. Усе яны дзяліліся сваімі праблемамі праз форму на сайце [1] . 5 чалавек адважыліся звярнуцца асабіста.

«Канечне, лепшы эфект дасягаецца ў асабістай размове. Таму не бойцеся прыходзіць, дапаможам усім», – кажа каардынатар праекта юрыдычнай дапамогі Аляксандр.

Акрамя электроннай формы, на сайце «Студэнцкай Рады» таксама існуе магчымасць прычапіць электронныя копіі неабходных дакументаў. Гэта дае магчымасць юрыстам лепш разабрацца ў сітуацыі.

Юрысты-кансультанты: call for application

Зараз на пастаяннай аснове ў кансультацыі працуе 5 валанцёраў. Арганізацыя актыўна шукае новых супрацоўнікаў.

«У камандзе мы хочам бачыць студэнтаў старэйшых курсаў юрыдычных спецыяльнасцяў, якія цікавяцца абаронай правоў студэнтаў. Тэма ім блізкая, магчымасць атрымаць рэальны вопыт – каласальная», – упэўнены каардынатар праэкту.

Каб далучыцца да каманды юрыстаў-кансультантаў, якія працуюць са студэнцкімі праблемамі, неабходна запоўніць анкету і адправіць па электроннай пошце.

Дэдлайн падачы заявак – 8 лістапада. Адсылаць анкеты трэба па адрасе mr.barrister.com@gmail.com [2].

Як прымусіць універы змяніцца ў лепшы бок

«Студэнцкая Рада» запрашае студэнтаў распавесці пра праблемы ў сваіх ВНУ. Гэта ўнікальная магчымасць ананімна расказаць пра праблемы, якія існуюць у тваім універы, падзяліцца гэтай інфармацыяй з іншымі і рашыць яе!

Студэнты скардзяцца на стан пакояў інтэрната, адсутнасць прафесійнай літаратуры і падручнікаў, праблемы з буфетамі і практыку хабару.

«Мы выяўляем канкрэтныя парушэнні заканадаўства і пішам калектыўны зварот у атэстацыйную камісію. Зараз універы праходзяць атэстацыю, таму гэта самы час казаць пра праблемы. Мы можам звярнуцца і проста да рэктара. Зразумела, што ён будзе варушыцца, каб вырашыць праблему, бо трэба атрымаць атэстацыю», – дзеліцца сваім планам Аляксандр.

Хочаш змяніць становішча – пішы на mr.barrister.com@gmail.com [2]. Прыярытэт – прадстаўнікам рэгіёнаў.

Паводле: Настасся Ероха, ampby.org [3]