24 – 29 лістапада 2012 г.

Да 70-х угодкаў смерці вядомага польскага пісьменніка і легендарнага педагога Януша Корчака ў выдавецтве «Логвінаў» пры падтрымцы пасольства Рэспублікі Польшча ў Беларусі выйшаў 3-томнік для дзяцей і падлеткаў.

Гэтае выданне – абноўленыя і дапоўненыя пераклады кніг «Кароль Мацюсь Першы» (пераклала Ядвіга Бяганская) і «Кароль Мацюсь на бязлюдным востраве» (пераклаў Уладзімір Васілевіч), а таксама першае беларускае выданне кнігі «Кайтусь-чарадзей» (пераклала Марына Шода). Ілюстрацыі да трохтомніка зрабіла мастачка Настасся Атраховіч.

Таксама ў Мінску пройдзе шэраг мерапрыемстваў, звязаных з імем пісьменніка.

24 лістапада (субота) у галерэі сучаснага мастацтва «Ў» і кнігарні «логвінаЎ» (пр. Незалежнасці, 37А) пройдзе дзіцячы ранішнік «Кароль Мацюсь назаўжды».

У праграме:
- прагляд урыўкаў польскага мюзікла «Януш Корчак»;
- мастацкія чытанні пра прыгоды караля Мацюся і Кайтуся-чарадзея ад акторкі Ганны Хітрык;
- пачастунак для дзяцей.

Вядоўца ранішніка – Андрэй Хадановіч.

Пачатак а 14-й.

Уваход вольны.

27 і 29 лістапада ў другім корпусе гатэля «Мінск» (пр. Незалежнасці, 11), у навучальнай зале №609, адбудуцца адкрытыя лекцыі па гісторыі педагогікі і дзейнасці Януша Корчака з удзелам прафесара Анджэя Яноўскага.

Мадэратарка – Інэса Кур’ян.

Пачатак абедзвюх лекцыяў у 18.30.
Запрашаюцца ўсе ахвотныя.

28 лістапада (серада) творы Януша Корчака прэзентуюць студэнтам педуніверсітэта імя Максіма Танка (Савецкая, 18, актавая зала, другі паверх). У імпрэзе возьме ўдзел польскі прафесар педагогікі Анджэй Яноўскі, перакладчыкі Інэса Кур’ян і Уладзімір Васілевіч, а таксама нашчадкі перакладчыцы Ядвігі Бяганскай.

Вядоўца імпрэзы – Марына Шода.

Пачатак аб 11-й.



Януш Корчак – доктар, педагог, пісьменнік, публіцыст, грамадскі дзеяч, афіцэр польскага войска. Педагог-наватар, аўтар публікацый па тэорыі і практыцы выхавання. Пачынальнік дзейнасці па абароне правоў дзяцей і абсалютнага раўнапраўя дзяцей. У якасці дырэктара дзіцячага дому стварыў, між іншым, дзіцячы сяброўскі суд, у якім дзеці самі разглядалі свае справы і маглі прыцягваць да суду сваіх выхавальнікаў.

Корчак заснаваў першы педагагічны часопіс, які змяшчаў матэрыялы, дасланыя дзецьмі, і разлічаныя галоўным чынам на юнага чытача – «Малы агляд» (Mały Przegląd). Ён быў адным з пачынальнікаў даследаванняў у галіне развіцця і псіхалогіі дзіцяці, а таксама выхаваўчай дыягностыкі.

Польскі габрэй, ён усё жыццё казаў пра сваю прыналежнасць да абодвух народаў.

Прайдзісвет [1] + Афіша [2] ў суполцы кнігарні «ЛогвінаЎ»