Ужо другі год традыцыйная беларуская дыктоўка да дня роднай мовы ў Магілёве дапаўняецца беларускім пяціборствам для дарослых. Каля шасцідзесяці магілёўцаў прыйшлі 3 сакавіка ў белую залу абласнога палаца культуры пісаць тэкст Максіма Гарэцкага пад дыктоўку настаўніка беларускай мовы Юрася Каласоўскага, які толькі што перамог у гарадскім конкурсе «Настаўнік года-2013». 34 з іх узялі ўдзел у пяціборстве. Чаму не ўсе? У людзей, асабліва сталага веку, яшчэ з часоў савецкай школы засталося ў свядомасці такое: калі я нечага не ведаю, то я дурань. На жаль, нярэдка і зараз, калі вучань прыйшоў у школу з непадрыхтаваным хатнім заданнем, настаўнік накідваецца на яго з словамі «дурань», «дэбіл», «недавумак» ды інш. Але тут варта ўспомніць славутага ўкраінскага настаўніка Васіля Сухамлінскага, які аднойчы звярнуўся да сваіх калегаў-настаўнікаў з заклікам «Паважайце няведанне!» Сапраўды, няведанне – не грэх і не загана. І калі чалавек лічыць сваё няведанне недахопам свайго развіцця, то ад гэтага недахопу сёння можна без цяжкасці пазбавіцца. Дапамагчы людзям усвядоміць хібы сваёй адукацыі і часткова залапіць іх па найбольш істотных пазіцыях чалавечага развіцця і ёсць галоўнай мэтай праекта «Беларускае пяціборства».

Па заканчэнні спаборніцтва кожны спаборнік атрымаў аркуш з адказамі, адкуль даведаўся (калі не ведаў раней) і пра асаблівасці націскаў у беларускіх словах, і пра магілёўскіх паплечнікаў Каліноўскага, і пра найбольш выбітных сябраў рады БНР, і пра пісьменнікаў, якія маюць дачыненнне да Магілёўшчыны, і пра тое, калі трэба і калі не трэба баяцца навальніцы, ды пра шмат што яшчэ. А тыя, хто што-нішто з гэтага ведаў і зарабіў сваім веданнем высокія балы, атрымалі прызы пяціборства.

Першае месца заняў старшыня гарадской арганізацыі ТБМ Алег Дзьячкоў, дзякуючы высокім балам у гуманітарных намінацыях (лепшыя адказы ў намінацыях «гісторыя» і «літаратура»). На другім месцы ўжо памянуты тут Юрась Каласоўскі. Трэцяе месца заняў малады хлопец Іван Вус, які ў гуманітарных намінацыях атрымаў мала балаў, але быў лепшым у матэматыцы і прыродазнаўстве. Будзе штуршок для хлопца падмацаваць свае веды ў гісторыі сваёй краіны, яе мове і літаратуры. Але найбольш здзівіла галоўны архітэктар праектнага бюро ўпраўлення архітэктуры гарвыканкама Ала Маскалькова, якая перамагла ў намінацыі «мова». Перамагла, нягледзячы на тое, што ў спаборніцтве бралі ўдзел некалькі настаўнікаў беларускай мовы.

Удзел у беларускім пяціборстве ўзяў і палітык Рыгор Кастусёў з дачкой. І паказаў някепскія вынікі – VI месца. Астатняя інфармацыя – на фотаздымках. Варта звярнуць увагу на фота, дзе спаборнікі чытаюць аркушы з адказамі – дзеля гэтай хвіліны і задумана беларускае пяціборства.

Міхась Булавацкі

Фотарэпартаж Надзеі Бацілавай з беларускага пяціборства для дарослых – ІІ


Так было годам раней: можна паглядзець тут [1]


Уступнае слова кіраўніка «Беларускага пяціборства»


Спаборнікі прыступілі да працы


Калі яшчэ гісторыку давядзецца развязваць матэматычныя задачы. Дацэнт універсітэта Алесь Агееў


Для архітэктара Алены Асмакоўскай матэматычныя задачы – зусім не экзотыка


А вось мастак Базыль Камароў задумаўся над пытаннямі з гісторыі


Што ж азадачыла выкладчыцу гісторыі Алену Цумараву?


Старшыня гарадской арганізацыі ТБМ Алег Дзьячкоў летась быў трэцім. І зараз паказаць годны вынік – справа гонару!

Настаўнік беларускай мовы Юрась Каласоўскі – пераможца гарадскога конкурса «Настаўнік года-2013». Але тут трэба выявіць свае веды не толькі ў мове


Экс-кандыдат у прэзідэнты Рыгор Кастусёў не стаў раіцца з дачкой, сам успамінае што засталося з школьнай праграмы і пазашкольнага патоку інфармацыі. Наўспамінаў даволі шмат – VI месца ў выніку


У Івана Вуса ўрокі матэматыкі і фізікі – зусім недалёкая частка жыцця


У індывідуальнага прадпрымальніка Алеся Самонава яны значна далей. Але і ён гатовы пазмагацца з маладзейшымі


Мысліцельная праца вельмі пасуе маладым дзяўчатам


Можна параіцца з суседкай. Правіламі гэта не забаронена


Пятро Шульгат у роздуме


Сябра журы Алена Асадчая за праверкай прац


Старшыня журы Міхась Булавацкі шукае, у каго самы высокі бал


Галоўны архітэктар гарвыканкаму Ала Маскалькова прыемна здзівіла: самы высокі бал за родную мову ў яе




Прыз за трэцяе месца – Івану Вусу. На высокае месца вывелі матэматыка і прыродазнаўства, бо балы ў гуманітарных намінацыях невысокія


Прыз за другое месца – Юрасю Каласоўскаму




Пераможца «Беларускага пяціборства для дарослых – ІІ» – Алег Дзьячкоў


Першае інтэрвію пераможцы – для БелАПАНу












Спаборнікі знаёмяцца з адказамі. Дзеля гэтых некалькіх хвілін і задумана беларускае пяціборства


Вось так выглядае гэтая хвіліна ў беларускім пяціборстве для школьнікаў (фота Алеся Асіпцова). Так бы чыталіся школьныя тэксты!


Леташні пераможца Сяргей Дымкоў абмяркоўвае з сябрамі аркуш з адказамі


Пытанні засталіся. Працяг будзе