«Серыял» пра штодзённыя клопаты берасцейскіх сокалаў, якія пасяліліся на 12 паверсе жылога дома, можна паглядзець у інтэрнэце.


У гняздзе берасцейскіх сокалаў: кадр з відэатрансляцыі


Скульптура св. Алены на фасадзе Бернардынскага касцёла ў Горадні, за якою пасяліліся сокалы. Фота birdwatch.by

Бернардынскі касцёл у Горадні. Фота radzima.org

Ўэб-камера, якую ўсталявалі ў гняздзе, працуе ўдзень і ўначы. Назіраць за сокаламі можна, дзякуючы грамадскай арганізацыі «Ахова птушак Бацькаўшчыны», якая ўжо не першы раз зарганізавала такую інтэрнэт-трансляцыю.

Цяпер назіраць гнездаванне птушак у рэжыме рэальнага часу можа кожны ахвочы на старонцы сайта Birdwatch.by [1].

Першую ж у гісторыі Беларусі ўэб-камеру для назірання за сокаламі ўсталявалі ў 2010 годзе на фасадзе Бернардынскага касцёла ў Горадні. Крылатая пара аблюбавала там месца за драўлянаю скульптураю св. Алены, куды вярталася пяць гадоў запар. Пасля таго, як камеру падключылі ды трансляцыю можна было глядзець у інтэрнэце, птушкі сталі настолькі папулярныя, што ім нават далі імёны. Самку назвалі ў гонар св. Алены, а самца – у памяць пра караля Рэчы Паспалітай Стэфана Баторыя.

У Горадні сокалы з’яўляюцца таксама ў вентыляцыйнай шахце на тэхнічным будынку прадпрыемства «Горадня Азот» і на тэлевышцы. Аднак самая шматлікая ў Беларусі калонія жыве ў Берасці. Апошнім часам сокалы ўсё часцей гняздуюць у гарадах. Адмыслоўцы мяркуюць, што прычына гэтага – хімікаты, якія атручваюць прыроду, ратуючы ўраджай на палях. Гарадскія калоніі сокалаў ёсць у Варшаве, Лондане і Парыжы.

Аліна Кашкевіч, belsat.eu [2]