18 мая ва ўсім свеце адзначаюць Міжнародны дзень музеяў. Напярэдадні (ці пасля) гэтага дня ў многіх краінах свету праходзіць міжнародная акцыя «Ноч музеяў». Выключныя эфекты, уласцівыя начному асвятленню, надаюць новае аблічча добра вядомым зборам музеяў, ператвараючы іх агляд у займальнае і захапляльнае дзеянне!

Запрашаем пазнаёміцца з праграмай Ночы музеяў у Беларусі 2023:
https://nochmuzeev.by/programmy/ [1]

Шаноўныя настаўнікі, здагадайцеся, з якіх музеяў гэтыя абвесткі?

... У гэтым годзе мы прысвячаем Ноч музеяў 1920-м гадам. Эпоха НЭПа, эпоха беларусізацыі, эпоха першых літаратурных арганізацый, росквіту паэзіі і агульнага культурнага ўздыму. Час, які прывёў не толькі Беларусь, але і ўвесь свет да эстэтыкі эклектызму: мадэрна і традыцыі, дэкадансу і росквіту, раскошы і беднасці, містыкі і навукі, мар і расчараванняў, бурапеннасці і стрыманасці, стылю і простасці. Прапануем вам разам з намі акунуцца ў рытмы цікавай і неадназначнай эпохі, якая незваротна змяніла наш сусвет....

... Эксклюзіўная містычная экскурсія, нечаканыя з’яўленні міфічных персанажаў, полымя ачышчальнага вогнішча разгоняць цемру і парушаць цішыню бяскрайніх абшараў музейнай вёскі. У гэтую ноч сцяжынкі ўздоўж хатаў будуць асвятляць толькі ліхтары і дапытлівыя вочы нашых гасцей...

... Вас чакае інтэрактыўная экскурсія з элементамі містыкі «Тэрыторыя прывідаў», а потым 21.30 — кінапаказ пад адкрытым небам «Чорны замак Гальшанскі»...

... Запрашаем на ўнікальную начную экскурсію на 2 гадзіны з заплывам на дракары! Вы ўбачыце парк ноччу, з прыгожым асвятленнем і таямнічай атмасферай. Старт ад Урачыстай брамы а 20:00 ...

... Інтэрактыўная праграма “Шукайце жанчыну!” Толькі ў гэту ноч фонды музея адкрыюць 7 унікальных прадметаў з цікавай гісторыяй, якія належалі “невядомым асобам”! Хто яны – жанчыны, што натхнялі думкі Паэта, напаўнялі сэрца замілаванасцю, былі сапраўднымі сябрамі і музамі?

... Праграма "Містычнае сярэднявечча" прапануе сярод іншага: майстар-клас «Зрабі свайго нячысціка», забаўляльны тэст «Хто ты з славянскай міфалогіі?», пляцоўку з загадкамі «Сакрэты алхіміі» і «Прадказанні ў шатры» ...

... Арт-ноч "У пошуку гармоніі Сусвету" і ... касмічная дыскатэка...

Сачыце за абвесткамі на старонцы https://www.facebook.com/nochmuzeev.by/ [2]