Газета Звязда
Парламенцкія слуханні па нацыянальнай сістэме адукацыі мяркуецца правесці восенню, паведаміў старшыня Палаты прадстаўнікоў Уладзімір Андрэйчанка на пасяджэнні Савета Палаты прадстаўнікоў.
"Думаю, што парламенцкія слуханні па нацыянальнай сістэме адукацыі мы правядзем восенню", - адзначыў Уладзімір Андрэйчанка.
Ён нагадаў, што ў бягучым годзе будзе праведзена мінімум два парламенцкія слуханні - па адным у сесію. "Калі падрыхтуем больш, гэта будзе толькі вітацца", - сказаў ён.
"У красавіку мы абмяркуем пытанні барацьбы з наркаманіяй. Пастаяннай камісіі па заканадаўстве неабходна сур'ёзна падрыхтаваць гэтае мерапрыемства, каб яго вынікам сталі якасныя рэкамендацыі, якія будуць пакладзены ў аснову канкрэтных заканадаўчых прапаноў, у тым ліку змены ў раней прынятыя законы", - даручыў Уладзімір Андрэйчанка.
На яго думку, такі ж падыход павінен быць пры падрыхтоўцы семінараў і выязных пасяджэнняў. У бягучым годзе запланавана правядзенне пяці семінараў. "Бліжэйшы семінар па пытаннях дзяржаўна-прыватнага партнёрства адбудзецца 1 лютага. Тэма вельмі важная, і вынікі яе абмеркавання павінны знайсці адлюстраванне ў законапраекце, які дапрацоўваецца ў Пастаяннай камісіі па эканамічнай палітыцы", - падсумаваў Уладзімір Андрэйчанка.