Наталля Ільініч: Я спадзяюся ўсё ж такі, што вярнуся ў сваю школу

Суддзя Святлана Акуліч адхіліла пазоў Наталлі Ільініч наконт аднаўлення той на працы ў талькаўскай школе. Адмова, у пэўнай ступені, прадказальная: справа выглядала больш палітычнай, чым прафесійнай. Баліць ад гэтага не менш.

Калегі даводзілі, што Наталля Ільініч – з найлепшых настаўнікаў. Казалі пра стаж і сумленнасць. Былыя вучні сведчылі пра паступленні ў ВНУ без дапамогі рэпетытараў. Бацькі вучняў выказвалі словы падзякі. Такая падтрымка шмат каштуе – не кожны зможа адолець страх ды сумневы і сказаць сапраўдныя, не для галачкі, словы.

Наталля Ільініч: Я пра сябе многа новага даведалася, столькі добрага... Мае калегі падтрымалі мяне, і бацькі, шмат. Некаторыя пабаяліся – так і сказалі.

Настаўнік.info: Чаму яны пабаяліся?

Наталля Ільініч: Яны баяліся, што дырэктар будзе дзяцей пераследаваць. Што мяне не адновяць, а дзіця таго, хто прыйдзе, будзе прасавацца. Ніна Цімафееўна (Ніна Пузына, маці двух вучняў спн. Наталлі) прыйшла, таму што ў яе дзеці вялікія. Іх не дастаць дырэктару нашаму.

Баліць Наталлі. Баліць калегам і вучням. Баліць грамадству: са школ, дзе вучыцца нашыя дзеці, выцясняюцца пакліканыя настаўнікі.

Наталля Ільініч: Зараз мне вельмі дрэнна, калі шчыра. Я ўчора наіўна думала, што... Мне здавалася што суддзя так добра ўсё распытала, сведкі сведчылі, так было ўсё ясна, рашэнне было на паверхні проста... Я ўсё ж такі падумала, што суддзя сумленне мае. Зразумела, што рашэнне заказана, але я думала, што яна мужнасць знойдзе ў сабе...

Настаўнік.info: Што б Вы параілі настаўнікам, з якімі беспадстаўна не заключаюцца кантракты?

Наталля Ільініч: Тут як у каго атрымаецца, змагацца, канешне, заўсёды варта.

Настаўнік.info: Ці шкадуеце, што адстойвалі свае інтарэсы ў судзе?

Наталля Ільініч: Не.

Настаўнік.info: Ці разлічваеце Вы на касацыйны суд?

Наталля Ільініч: Я спадзяюся ўсё ж такі, што вярнуся ў сваю школу. З мяне робяць прафесійную рэвалюцыянерку – а я хачу быць настаўніцай.


Дырэктарка Меркуль і былая настаўніца Ільініч


Суддзя Акуліч




Дыпломы і падзякі


Вучаніцы


Дырэктарка Меркуль да службы гатова?