«Чалавек у нядолі»: Конкурс праектаў

Апошні тэрмін падачы заявак – 3 сакавіка 2012 г.

Чэшская няўрадавая арганізацыя «Чалавек у нядолі» пачынае прыняцце заяваў на мікрагранты па праектах развіцця і падтрымкі грамадзянскай супольнасці ды інфармаванасці аб мясцовых праблемах у рэгіёнах Беларусі.

Мэтамі праграмы з’яўляюцца: актывізацыя грамадскай дзейнасці ў рэгіёнах, далучэнне новых людзей да грамадскай дзейнасці. Асаблівая ўвага будзе надавацца арыгінальнасці і навізне праектаў. Удзельнічаць у конкурсе могуць няўрадавыя арганізацыі, ініцыятыўныя групы і нефармальныя аб’яднанні.

Заявы на мікрагранты павінны адпавядаць наступным патрабаванням:

- змяшчаць дакладную мэту і мэтавую групу, а таксама доказы, што арганізацыя здольная дасягнуць мэты, названыя ў праекце;
- заяву можа падаць арганізацыя ці некалькі арганізацыяў, якія супрацоўнічаюць паміж сабой;
- заява павінна змяшчаць інфармацыю пра ўжо рэалізаваныя праекты і іх спонсараў;
- рэалізацыя і справаздачнасць праекта павінны быць выкананыя да 30 чэрвеня 2012 г.;
- заявы прымаюцца на беларускай, рускай і англійскай мовах.

Структура заяўкі:

I. Агульная інфармацыя.
1. Назва праекта.
2. Назва арганізацыі.
3. Кіраўнік праекта, Праектная група / Рэалізатары.
4. Кантактныя зьвесткі: Адрас, Электронная пошта, Тэлефон, Skype.
5. Рэгіён.
6. Сума гранта.
7. Раней рэалізаваныя праекты і іх спонсары.
8. Тэрмін рэалізацыі праекта.

II. Апісанне праекта (не больш за 2 нармаваныя старонкі A4).

III. Мэта/ Чаканыя вынікі/ Мэтавая група (не больш за старонку A4).

IV. План дзеянняў/ Часавы графік.

V. Каштарыс (паводле магчымасці ў Excel).

Каб паўдзельнічаць у конкурсе, неабходна даслаць заяўку, запоўненую згодна з патрабаваннямі, на электронны адрас: lida.vackova@clovekvtisni.cz .

Апошні тэрмін падачы заявак: 3 сакавіка 2012 г.

Паводле рассылкі Асамблеі НДА belngo.info