Зварот Івонкі Сурвіллы да настаўнікаў

«А ад Вас залежыць у вялікай меры павага ў Беларусі да свае мовы, да ўсяго беларускага, бо Вы з'яўляецеся найбольшым аўтарытэтам для сваіх вучняў.»
Адкрыты ліст старшыні Рады БНР Івонкі Сурвіллы да настаўнікаў Беларусі з нагоды пачатку новага школьнага года.
Паводле Радыё Свабода

“Нічога так моцна мяне не задавальняе, як быць настаўнікам ды выхоўваць дзетак, якія будуць уважаць сваім абавязкам прычыніцца да дабрабыту нашага свету...” Так аднойчы гаварыў усім ведамы ў Канадзе настаўнік Юстын Трудо, сын найбольш ведамага канадскага прэм'ер-міністра П'ера Трудо.

Дарагія настаўнікі Беларусі, як прыемна было б пачуць, што Вы таксама выбралі гэтую прафесію, каб зрабіць з нашых беларускіх дзетак лепшых Беларусаў, з пачуццём адказнасці за будучыню свае Бацькаўшчыны, за зберажэнне свае культуры і свае мовы. Вельмі ж прыкра чуць юнакоў, якія прыяжджаюць з Беларусі на летні адпачынак у Канаду ды дзівяцца, што нехта ў Канадзе гаворыць па-беларуску...

Мы тут гэтую мову шануем і ўважаем нашым агульнабеларускім скарбам. Пачуццё гэтае стараемся перадаць нашым дзецям. Уявеце сабе іхнае расчараванне, калі прыехаўшы ўпершыню ў Беларусь яны чуюць мову чужую, не беларускую. А ад Вас залежыць у вялікай меры павага ў Беларусі да свае мовы, да ўсяго беларускага, бо Вы зяўляецеся найбольшым аўтарытэтам для сваіх вучняў.

У жыцці кожнага з нас былі настаўнікі, якія зрабілі на нас велізарны ўплыў. Некаторыя з нас выбралі прафесію дзеля свайго захаплення настаўнікам ці настаўніцай. Уплыў настаўнікаў на наш светапогляд, на людскія вартасці, якіх мы будзем прытрымоўвацца да канца жыцця, бясспрэчны. У нашым свеце, дзе бацькі праводзяць штораз менш часу з сваімі дзецьмі, таму што змушаныя абое працаваць, ад Вас залежыць будучыня нашага народу і нашага краю.

Што рэжым у Беларусі антыбеларускі, гэта ўсім ведама Але ж да сумлення Вашага ніхто апрача Вас самых не мае доступу. Сваім прыкладам настаўнік можа зрабіць болей як усе ўказы дыктатара. Звяртаюся да Вас сёньня з просьбай: выхоўвайце ў беларускім духу нашых дзетак, каб яны не цураліся свайго. Каб яны былі гордыя, смелыя, прынцыповыя. Каб разумелі, што Беларусь іхная Бацькаўшчына і што іхным святым абавязкам ёсць яе бараніць ад чужых імперыялістычных намераў.

Вы, дарагія настаўнікі Беларусі, можаце як ніхто іншы адрадзіць беларускую Беларусь! Сілаў і мужнасці Вам у Вашай ахвярнай працы.

Івонка Сурвілла Старшыня Рады БНР