Архіў навін
Выстава «Дэманструецца ўпершыню»
29 студзеня Нацыянальны музей гісторыі і культуры Беларусі прадставіў экспазіцыю «Дэманструецца ўпершыню», складзеную з новых паступленняў у музейны збор.
Сярод найцікавейшых экспанатаў — радзівілаўская карта пачатку XVII
стагоддзя, арнат (убранне каталіцкага святара) з устаўкамі з слуцкага
пояса, парцалянавая талерка майсенской мануфактуры з сервізу польскага караля Аўгуста II Моцнага.
Як паведаміла намеснік дырэктара музея Ніна Калымага, ідэя стварэння
карты паўстала ў Мікалая Радзівіла Сіроткі. Яна была замоўленая мастаку-гравёру Томашу Макоўскаму, які завяршыў працу ў 1603 годзе.
Нажаль, першапачатковы варыянт карты не захаваўся. У 1613 году Т. Макоўскі выдае яе ў Амстэрдаме. На сёння вядомы толькі адзін асобнік — ён знаходзіцца ва універсітэце швецкага горада Упсала. Карта ж, прадстаўленая ў новай экспазіцыі музея, датуецца перыядам 1613—1630 гадоў.
На выставе прадстаўленыя таксама каштоўныя знаходкі археолагаў у курганных магільніках Браслаўскага раёна Віцебскай вобласці, матэрыялы
з сямейных архіваў, творы дэкаратыўна-прыкладнага мастацтва.
Паводле БелаПАН
Лекцыі па беларускай гісторыі і краязнаўстве
4 лютага ў мінскай сярэдняй школе №180 адбудзецца лекцыя беларускага эсэіста, мастака, супрацоўніка музея-заказніка “Заслаўе” Юрася Малаша на тэму “Язэп Драздовіч. Невядомы гісторык, пісьменнік, вучоны”.
Язэп Драздовіч вядомы беларусам перадусім як мастак. Лекцыя Юрася Малаша мае мэтай распавесці пра малавядомыя бакі жыцця і творчасці Язэпа Драздовіча, перадусім пра яго навуковую і літаратурную дзейнасць.
Пачатак а 14.00
А 11 лютага ў музеі вёскі Радунь Воранаўскага раёну адбудзецца лекцыя краязнаўцы, рэдактара газеты “Наша слова” Станіслава Судніка на тэму “Праблемы краязнаўства ў Воранаўскім раёне”. Пачатак а 16.00
Паводле budzma.org
Крытычнае ацэньванне Інтэрнэт-старонак для вучняў рознага ўзросту
Раней мы ўжо размяшчалі пераклад фрагментаў кнігі ўкраінскіх аўтараў Н. Вукінай, Н. Дэментыеўскай і І. Сушачанкі «Крытычнае мысленне: як яму навучаць», прысвечаныя саманавучанню настаўнікаў крытычнаму ацэньванню інтэрнэт-рэсурсаў. У працяг тэмы навучання «разумнаму» выкарыстанню Інтэрнэта прапануем вам пераклад фрагметаў гэтай жа кнігі, прысвечаны канкрэтным методыкам правядзення ўрокаў па развіцці крытычнага мыслення ў школьнікаў рознага ўзросту – ад малодшых да старшакласнікаў.
Спампаваць тут (pdf, 181 КБ)
Конкурс грантаў Еўрапейскай камісіі
Еўрапейская Камісія абвесціла новы конкурс праектных прапановаў у межах праграмы «Аб'яднанні грамадзянаў і органы мясцовай улады: праграмы для Беларусі".
У конкурсе могуць прымаць удзел заяўнікі, якія:
• з'яўляюцца юрыдычнымі асобамі;
• з'яўляюцца некамерцыйнымі арганізацыямі;
• з'яўляюцца аб’яднаннямі грамадзянаў (АГ) ці мясцовымі ўладамі, створанымі ў адпаведнасці з дзеючым заканадаўствам сваёй краіны. АГ з Беларусі мусяць быць зарэгістраваныя не менш як за два гады да падачы праектнай прапановы.
Беларускія ўдзельнікі могуць дзейнічаць самастойна ці супольна з арганізацыямі-партнерамі. Вітаецца удзел беларускіх удзельнікаў у якасці партнераў па праектных прапановах, пададзеных АГ з дзяржаваў-сябраў Еўрасаюза.
Апошні тэрмін падачы заявак: 5 мая 2009 года.
Інструкцыя для заяўнікаў і форма заяўкі знаходзяцца тут.
Падрабязную інфармацыю аб конкурсе чытайце на сайце Дэлегацыі Еўрапейскай Камісіі ў Беларусі.
Паводле рассылкі belngo.info
Гадавіна да 125-годдзя Антона Луцкевіча
29 студзеня адзначаецца 125‑я гадавіна з дня нараджэння нашага вялікага суайчынніка Антона Луцкевіча.
З гэтай нагоды адбудзецца ўрачысты вечар, на якім будуць узгаданы яскравыя моманты жыцця А. Луцкевіча і яго ўклад у станаўленне незалежнай Беларусі.
Гісторык і аўтар кніг пра братоў Луцкевічаў Анатоль Сідарэвіч адзначыў: «Антон Луцкевіч — адзін з заснавальнікаў і ідэолаг Беларускай Сацыялістычнай Грамады – першай палітычнай партыі ў нашай краіне, фактычны рэдактар і вядучы публіцыст газеты «Наша Ніва». Ён з’яўляўся ініцыятарам абвяшчэння незалежнасці Беларускай Народнай Рэспублікі, а таксама аўтарам тэксту Трэцяй Устаўнай Граматы Рады БНР (Акту 25 Сакавіка)»
Мерапрыемства адбудзецца 29 студзеня ў 19 гадзін па адрасе: г. Мінск, пр‑т Машэрава (былая вул. Варвашэні), д. 8.
Паводле Нашай Нівы
Што трэба, каб у садку з'явілася беларускамоўная група
У мінскім мікрараёне Сухарава арганізоўваюць беларускамоўную рознаўзроставую групу ў дзіцячым садку.
Вырашэнне аб стварэнні групы прымаецца мясцовымі ўладамі – упраўленнем адукацыі – штогод у красавіку. Таму заявы аб стварэнні беларускай групы трэба туды падаць да гэтага часу. Усе зацікаўленыя могуць звярнуцца да Дар’і Каткоўскай па тэлефоне 395 73 99 ці напісаць ёй на адрас apalonik@gmail.com
.
Паводле радыё Свабода
Чытанка ад “Бацькаўшчыны”
Па замове “Згуртавання беларусаў свету “Бацькаўшчына” з друку выйшла ўнікальная кніжка для дзяцей дашкольнага ўзросту – “Чытанка для дзіцячага садка”. Адметнасць кнігі ў тым, што творы, якія ўвайшлі ў зборнік (а гэта і беларускія народныя казкі, і творы сучасных беларускіх пісьменнікаў, і эміграцыйных аўтараў, і пераклады), падзелены па ўзроставых катэгорыях. Укладальнікі “Чытанкі” – Вінцук Вячорка, Пятро Садоўскі.
“Чытанка” цалкам беларускамоўная. Яна не з’яўляецца метадычным дапаможнікам, але кніга зойме вартае месца на палічках як выхавальнікаў дзіцячых садкоў, так і ў хатніх бібліятэках бацькоў.
Выданне сталася магчымым дзякуючы падтрымцы Ірэны Каляды-Смірновай (ЗША). Дарэчы, са спадарыняй Ірэнай Згуртаванне “Бацькаўшчына” супрацоўнічае ўжо амаль 12 год, і дзякуючы менавіта яе падтрымцы шмат выдатных беларускіх кніжак пабачыла свет.
Выстава Андрэя Бурсава
З 30 студзеня па 28 лютага ў Музеі гісторыі беларускай літаратуры (вул. М. Багдановіча, 15, Траецкае прадмесце) будзе працаваць выстава жывапісу Андрэя Бурсава
“Златадзён”. На адкрыцці выставы, якая мае адбыцца 30 студзеня ў 17:00, будуць таксама прадстаўленыя вершаваныя творы мастака і выступіць гурт “Расалія”.
Выстава будзе працаваць з панядзелка па суботу ад 9:30 да 17:30.
Тэл.: (017) 334 56 21; (017) 334 99 32
«З рога ўсяго многа», і з куфара таксама
На сайце, расправаным настаўнікам Сяргеем Сівым «З рога ўсяго многа» не так даўно адбылося абнаўлення дызайну і структуры. Таму запрашаем туды ўсіх, каго цікавяць матэрыялы для пазашкольных мерапрыемстваў: сцэнары святаў, фанаграмы, беларускамоўныя крыжаванкі і г.д.
І прапануем сцэнар пазашкольнага мерапрыемства «Чароўны куфэрак», прысвечанага народным прыказкам, прымаўкам, гумару ды іншым элементам даўняй і сучаснай народнай творчасці. Аўтары – выкладчыкі Брэсцкага дзяржаўны універсітэт імя А. С. Пушкіна М. П. ОСІПАВА і З. М. ПАНАСЕВІЧ.
Сцэнар пазашкольнага мерапрыемства «Чароўны куфэрак», прысвечанага народным прыказкам, прымаўкам, гумару ды іншым элементам даўняй і сучаснай народнай творчасці. Аўтары – выкладчыкі Брэсцкага дзяржаўны універсітэт імя А. С. Пушкіна М. П. Осіпава і З. М. Панасевіч.