З Мінадукацыі сышоў Казімір Фарыно

Магчыма, справа проста ва ўзросце. Сёлета Казіміру Сцяпанавічу — 60 гадоў. Ён нарадзіўся ў вёсцы Бараўкі (Мядзельскі раён). Скончыў педагагічны ўніверсітэт, працаваў у школе настаўнікам фізікі.

Фарыно быў намеснікам міністра 10 гадоў, ад 2002. У міністэрстве ён курыраваў дзейнасць дашкольнай, сярэдняй і спецыяльнай адукацыі. Таксама за ім былі замацаваныя Акадэмія паслядыпломнай адукацыі і Рэспубліканскі інстытут кантроля ведаў. Біяграфію Фарыно ўжо знялі з сайта Міністэрства адукацыі.

Нярэдка намеснік міністра агучваў рашэнні ведамства. Напрыклад, пра тое, што школьнікі як ездзілі на бульбу, так і будуць ездзіць.

Балючае пытанне мовы навучання таксама не абыходзілася без Фарыно. Пасля пераходу выкладання гісторыі Беларусі па-расейску чыноўнік сказаў наступнае: «У школах з расейскай мовай навучання гэты вучэбны прадмет можа вывучацца на расейскай або беларускай мове. Рашэнне прымаецца мясцовымі выканаўчымі і распарадчымі органамі з улікам пажаданняў вучняў або іх законных прадстаўнікоў». Як вынік — гісторыя Беларусі па-ранейшаму выкладаецца па-расейску ў большасці школ.

Летась на алімпіядзе на алімпіядзе школьнікаў «Расія і Беларусь: гістарычная і духоўная супольнасць» у Гомелі Фарыно задалі пытанняў, чаму ў заданнях няма ніякіх элементаў беларускай мовы. На гэта журналісты атрымалі адказ: ««Сёння такія вось правакацыйныя пытанні не маюць пад сабой падстаў, у нас роўная колькасць гадзін на вывучэнне як беларускай, гэтак і расейскай моваў».

А потым дадаў, што «дзяржава падтрымлівала і падтрымлівае ўсё наша нацыянальнае, айчыннае, усё, што створана тут самае лепшае», таму беларуская мова не знікне.

На адным з апошніх з’яўленняў на людзях Казімір Фарына агучыў, што пераходу на беларускую ў выкладанні гісторыі і геаграфіі не будзе, бо школьнікі дрэнна валодаюць беларускай мовай. Вось такая супярэчнасць: з аднаго боку — праблемы з мовай няма, а з іншага — вучні яе не ведаюць.

Фарыно таксама запомніўся сваёй шалёнай ідэяй аб стварэнні агульнага падручніка па гісторыі для ўсіх краін СНД. Як аб’яднаць «бульдога з насарогам» растлумачана не было, а падручнік так і не з’явіўся.

Паводле інфармацыі ej.by, дачка былога намесніка міністра адукацыі ўжо даўно жыве ў Галандыі.

У Мінадукацыі затое цяпер прыйшоў Васіль Будкевіч, былы кіраўнік Кастрычніцкага раёна Віцебска.

Цікава, што ў яго падначаленых хадзіў віцебскі чыноўнік-русафіл Андрэй Герашчанка.

«Калі ў яго з-за грамадскай дзейнасці дзесьці, умоўна кажучы, дах паехаў у пэўных пытаннях, то правядзем выхаваўчую працу і праводзім», — казаў Будкевіч пра словы Герашчанкі аб тым, што Беларусь ёсць «рускай дзяржавай», паставіўшы пад сумнеў існаванне беларускай мовы і незалежнасці.

Урэшце, Герашчанка за свае радыкальныя погляды быў звольнены з аддзелу моладзі Кастрычніцкага раёна Віцебска. Наўрад ці можна бачыць у гэтым волю Васіля Будкевіча. Хутчэй за ўсё, яму самому прыйшоў такі загад зверху.

Зміцер Панкавец, Наша Ніва