Больш за 90 % выпускнікоў сярэдніх агульнаадукацыйных устаноў лічаць беларускую мову роднай. Аб гэтым расказаў журналістам загадчык сектара суправаджэння нацыянальнага даследавання якасці адукацыі і міжнародных даследаванняў у гэтай галіне Акадэміі адукацыі Вячаслаў Караткевіч, перадае карэспандэнт агенцтва «Мінск-Навіны».
Даследаванні праводзіліся ў 2022/2023 навучальным годзе. Таксама каля 25% выпускнікоў лічаць вывучэнне беларускай мовы адным з паказчыкаў патрыятызму і грамадзянскасці.
- Сярод моладзі родная мова становіцца ўсё больш папулярнай, таму што з'яўляецца маркерам інтэлігентнасці, - адзначыў В. Караткевіч. - Больш за трэць апытаных карыстаюцца ёю ў паўсядзённым жыцці.
Паводле яго слоў, Міністэрства адукацыі праводзіць палітыку роўнай увагі да абедзвюх дзяржаўных моў рэспублікі: да беларускай і рускай. Такі падыход закладзены ў новы стандарт для агульных сярэдніх, дашкольных і спецыяльных адукацыйных устаноў, які зараз распрацоўваецца спецыялістамі Акадэміі адукацыі. Што да адукацыйных праграм, то ўсе яны перакладаюцца на беларускую мову.
Меркаванне вучонага падтрымала і галоўны рэдактар грамадска-палітычнага і літаратурна-мастацкага часопіса "Бярозка" для дзяцей сярэдняга і старэйшага школьнага ўзросту Яніна Каралёва. Паводле яе слоў, рэдакцыя надае вялікую ўвагу сваім праектам у сацсетках, імкнучыся ствараць там беларускамоўнае асяроддзе. І вынікі ёсць. Напрыклад, відэаролікі ў Tik-Tok збіраюць да 47 тыс. праглядаў (сам профіль дзейнічае з верасня леташняга года). У Telegram колькасць унікальных наведвальнікаў амаль у 2,5 раза большая, чым падпісчыкаў.
На думку Я. Каралёвай, гэта азначае, што беларускую мову ў моладзі ў трэндзе, і яе трэба ўсяляк падтрымліваць.
Паводле https://minsknews.by