Еўрапейскі тыдзень з ЕГУ

Еўрапейскі гуманітарны універсітэт запрашае студэнтаў бакалаўрскіх, магістарскіх і аспіранцкіх праграм беларускіх, літоўскіх і замежных ВНУ прыняць удзел у міжкультурным праекце «Еўрапейскі тыдзень».

Праект задуманы з мэтай фармавання платформы для прэзентацыі Беларусі і
беларускай інтэлектуальнай супольнасці еўрапейскім калегам, а таксама для таго, каб азнаёміць беларусаў з працэсамі еўрапейскай інтэграцыі. Арганізатары «Еўрапейскага
тыдня» спадзяюцца, што гэтая падзея стане пачаткам усведамлення і фармавання ўласнай еўрапейскай ідэнтычнасці.

У рамках праекту мяркуецца правядзенне трохдзённай міжнароднай студэнцкай
канферэнцыі і праца трох секцый:

• Беларусь на межах Еўропы

• Еўропа як аб'ект вывучэння

• Цэнзура ў беларускіх медыя

Акрамя таго, удзельнікі канферэнцыі прымуць удзел у тэматычных круглых сталах з вядомымі беларускімі і замежнымі акадэмічнымі дзеячамі, палітыкамі, журналістамі і інш.
Падчас «Еўрапейскага тыдня» адбудзецца шэраг сустрэч з прадстаўнікамі еўрапейскіх арганізацый, фотавыстава і кінапаказы.

Даты правядзення мерапрыемства: 14 – 18 красавіка 2008 г. (Вільнюс, Літва).

Для ўдзелу ў праекце неабходна да 1 красавіка 2008 г. накіраваць у аргкамітэт праекту заяўку вызначанага ўзору (гл. дадатак 1). У заяўцы неабходна даць кароткую анатацыю свайго выступу і пазначыць:

• Тэму дакладу.

• Секцыю (іі), у працы якой вы жадаеце прымаць удзел.

Аргкамітэт праекту праводзіць конкурс заявак, па выніках якога найлепшым
замежным (і іншагароднім) прэтэндэнтам забяспечваецца поўная аплата выдаткаў на праезд і пражыванне. У асобных выпадках па рашэнні аргкамітэту магчыма частковае пакрыццё выдаткаў.
Па выніках канферэнцыі мяркуецца стварэнне электроннай версіі матэрыялаў канферэнцыі і круглых сталоў і выпуск іх у фармаце CD-дыска «Еўрапейскі тыдзень».

Працоўныя мовы канферэнцыі: беларуская, руская, англійская.

Заяўкі на ўдзел у праекце дасылайце на электронны адрас: euroweek@ehu.lt з пазнакай zajauka.

Праз гэты адрас можна таксама атрымаць кансультацыі па любых пытаннях,
датычных правядзення канферэнцыі.

Паводле http://ehu.lt/