На 29 лістапада ў Палаце прадстаўнікоў былі запланаваныя слуханні «Нацыянальная сістэма адукацыі: стан і шляхі ўдасканалення». Але новая рэдакцыя Кодэксу аб адукацыі ў Палату прадстаўнікоў не паступіла, сказаў старшыня Палаты прадстаўнікоў Уладзімір Андрэйчанка. Таму шырока анансаваныя парламенцкія слуханнні перанесеныя. Міністр адукацыі Ігар Карпенка цяпер у адпачынку.

Намесніца старшыні сталай камісіі па адукацыі, культуры і навуцы Алена Анісім пацвердзіла, што апошняй версіі Кодэксу аб адукацыі дэпутаты не бачылі. 

Алена Анісім

«Дакумент сурʼёзны. Было зладжана грамадскае абмеркаванне Кодэксу аб адукацыі. Мы не ведаем, якія прапановы былі ўлічаныя, якія — не. Перад пачаткам навучальнага года было зроблена шмат заяваў па рэфармаванні сістэмы адукацыі. Ці адлюстраваныя яны ў новай рэдакцыі Кодэксу аб адукацыі, і наогул ці дапрацаваны дакумент — невядома. Мы з Міністэрства адукацыі яго не атрымалі. Зноў абмяркоўваць агульную канцэпцыю, агульныя падыходы няма сэнсу. Таму сёння перад пачаткам пленарнага паседжання на Радзе Палаты прадстаўнікоў спадар Андрэйчанка абвясціў, што парламенцкія слуханні пераносяцца».

У прэсавай службе Міністэрства адукацыі Свабодзе сказалі, што не валодаюць інфармацыяй, на якой цяпер стадыі праца над новай рэдакцыяй Кодэксу аб адукацыі. Міністр адукацыі Ігар Карпенка ў адпачынку.

Каментар Nastaunik.info. Відавочна, Міністэрства адукацыі, якое самаізалявалася ад грамадства,  не мае ні кваліфікаваных кадраў, ні яснага бачання развіцця адукацыі, таму і не можа зрабіць  якасныя прапановы ў змену заканадаўства. Адукацыю давялі да крызісу, калі старое заканадаўства ўжо не можа адпавядаць сучасным патрабаванням інфармацыйнага грамадства і толькі стрымлівае інавацыі, патрэбныя для падрыхтоўкі маладога пакалення да рынку працы і жыцця ў сучасным свеце. А новы закон не можа паўстаць, бо "вярхі" патрабуюць захаваць савецкую сістэму і падыходы.   Касметычныя праўкі ўжо не дапамагаюць. Наспеў час падрыхтоўкі сапраўднай рэформы адукацыі, пазбаўлення яе ад камуністычных ідэалагем, састарэлага зместу і метадаў кіравання. Беларусі патрэбна Канцэпцыя новай беларускай школы, на аснове якой будзе напісаны і прыняты  новы сучасны закон аб адукацыі.

Любыя заканадаўчыя змены пачынаюцца з канцэпцыі - г.зн. яснага ўсведамлення мэтаў адукацыі і шляхоў іх дасягнення.  Прапануем пазнаёміцца, як з гэтай задачай спраўляецца Украіна, якая сёлета (апошняй з нашых суседзяў) распачала рэформу адукацыі, узяўшы за ўзор паспяховыя рэформы  Фінляндыі і Польшчы. 

Канцэпцыя Новай украінскай школы

Больш за тры гады доўжыўся публічны дыялог аб стратэгіі зменаў у адукацыі Украіны. Дзясяткі дыскусій адбыліся на пляцоўцы парламенцкага Камітэта па пытаннях навукі і адукацыі, а пасля — Міністэрства асветы і навукі Украіны.
Адкрытасць была беспрэцэдэнтнай. Далучыліся прадстаўнікі ўсіх зацікаўленых групаў — педагогаў, бацькоў, працадаўцаў, палітычных сілаў і органаў улады, незалежныя эксперты, міжнародныя арганізацыі.
У выніку шматлікіх дыскусій, часам вельмі вострых, з’явіўся праект новага базавага Закону "Аб адукацыі". 
Гэты дакумент — Канцэптуальныя асновы рэфармавання сярэдняй адукацыі «Новая ўкраінская школа» — простай мовай тлумачыць ідэалогію зменаў, якія рэалізоўвае закон.
Мэта дакумента — зацікавіць ідэяй рэфармавання адукацыі як мага шырэйшыя колы. Бо рэформа адукацыі павінна быць падтрымана і настаўнікамі, і бацькамі, а таксама бізнэсам, мясцовымі ўладамі і ўсімі тымі, каго адукацыйная праблематыка тычыцца непасрэдна.

Пасля напісання Канцэпцыі і паслядоўных крокаў да яе ажыццяўлення, Фінляндыя заявіла аб дапамозе Украіне ў рэфармаванні яе сістэмы адукацыі.

Таварыства беларускай школы зрабіла пераклад Канцэпцыі Новай украінскай школы на беларускую мову, каб азнаёміць шырокае кола зацікаўленых беларусаў з сучаснымі тэндэнцыямі, і тымі зменамі, якія рана ці позна чакаюць і нашу адукацыйную сістэму.

Спампаваць Канцэпцыю "Новая школа" (PDF, 2,13 Mb)