11-12 кастрычніка на базе ДУА Акадэмія паслядыпломнай адукацыі прайшлі навучальныя курсы «Актыўная ацэнка як новая стратэгія навучання» для прадстаўнікоў педагагічнай грамадскасці Расійскай Федэрацыі. Ініцыятарамі міжнароднай сустрэчы выступіў «Цэнтр прафесійнага развіцця і інавацыйнай адукацыі» і ПТ «Садружнасць школ асобасна-арыентаванай адукацыі».
У семінары прыняло ўдзел 80 педагогаў з розных рэгіёнаў Расіі.
Мэтай семінара было пашырэнне міжнароднага супрацоўніцтва ў сферы адукацыі і перадача беларускага досведу выкарыстання стратэгій актыўнай ацэнкі як сродка павышэння акадэмічнай паспяховасці, унутранай матывацыі, ацэначнай самастойнасці і адказнасці навучэнцаў за ўласнае навучанне.
Адкрыла семінар Людміла Георгіеўна Тарусава, першы прарэктар акадэміі, кандыдат педагагічных навук, дацэнт. У сваім выступе яна прадставіла Акадэмію паслядыпломнай адукацыі, акрэсліла асноўныя напрамкі дзейнасці акадэміі, яе інавацыйны складнік.
З вітальным словам выступіла Алена Уладзіміраўна Радзевіч, начальнік цэнтра прафесійнага развіцця і інавацыйнай адукацыі. Асноўнай ідэяй семінара стала «Мы вучым таму, з дапамогай чаго мы вучым». Акцэнт быў зроблены на вызначэнні мэтаў і крытэрыяў паспяховага ўдзелу ў семінары - НаШтоБуЗУ, да якіх вярнуліся напрыканцы працы і змаглі правесці самаацэнку адносна дасягнення пастаўленых мэтаў.
Важна адзначыць, што ў Беларусь прыехалі вучыцца педагогі з розных куткоў Расійскай Федэрацыі. Упаўнаважаны прадстаўнік Садружнасці школ асобасна-арыентаванай адукацыі Аляксандр Юр'евіч Піменаў правёў знаёмства з педагогамі, якія прадстаўлялі розныя рэгіёны Расіі: пас. Белаярскі, пас. Старапышмінск, пас. Студэнцкі Свярдлоўскай вобласці; гарады Новаўральск, Петразаводск, Екацерынбург, Маскву і Тулу. Колькасць удзельнікаў семінара сведчыць, што актыўная ацэнка як адукацыйная тэхналогія вельмі папулярная не толькі сярод педагагічнай супольнасці Беларусі, бо актыўная ацэнка дае адказы на многія выклікі сучаснай адукацыі.
Педагогі Расійскай Федэрацыі выступілі з прэзентацыяй свайго вопыту кантрольна-ацэначнай дзейнасці.
У выступе Аляксандра Юр'евіча Піменава «Аб некаторых праблемах ацэньвання адукацыйных дасягненняў вучняў у сучаснай школе: вынікі апытанняў навучэнцаў, педагогаў і адміністрацый школ» была прадстаўлена доказная база, заснаваная на міжнародных навуковых даследаваннях, у прыватнасці, даследаванні Джона Хэці, дзе найбольш высокі фактар ўплыву на навучальныя дасягненні вучняў звязаны з актыўнай ацэнкай альбо яе складнікамі.
Цікавым для беларусаў быў падыход «Упраўленне на аснове дадзеных». На аснове гэтага падыходу Аляксандр Юр'евіч прадставіў вынікі даследавання, праведзенага ў 5 школах з 4 рэгіёнаў Расіі. Візуалізацыя вынікаў анкетавання дапамагла вылучыць праблемы існуючай ў Расіі сістэмы ацэньвання, вызначыць моцныя бакі, на якія можна абапірацца ў працэсе далейшага развіцця новых падыходаў да ацэньвання.
З асноўнымі складнікамі актыўнай ацэнкі як тэхналогіі навучання ўдзельнікаў семінара пазнаёмілі Мікалай Іванавіч Запрудскі, прафесар кафедры педагогікі і менеджменту адукацыі, кандыдат педагагічных навук і Алена Уладзіміраўна Радзевіч, начальнік цэнтра прафесійнага развіцця і інавацыйнай адукацыі ДУА «Акадэмія паслядыпломнай адукацыі».
Распаўсюд актыўнай ацэнкі адбываецца дзякуючы цеснаму супрацоўніцтву педагогаў Беларусі з Рэспубліканскім грамадскім аб'яднаннем «Таварыства беларускай школы». Усё больш і больш педагогаў далучаецца да ўдзелу ў дыстанцыйным навучанні, каардынатарамі якога з'яўляюцца Тамара Пятроўна Мацкевіч, намесніца старшыні ТБШ, галоўны рэдактар парталу nastaunik.eu і Мікалай Іванавіч Запрудскі. Пра асаблівасці і перавагах доўгатэрміновага дыстанцыйнага навучання па актыўнай ацэнцы распавяла Тамара Мацкевіч.
Удзельнікаў семінара парадавалі майстар-класы і ўрокі для дарослых, якія правялі педагогі, што прайшлі курс навучання і пацвердзілі яго эфектыўнасць уласнай адукацыйнай практыкай: Наталля Уладзіміраўна Катчанка з тэмай «Generation gap або як паменшыць разрыў пакаленняў»; Святлана Усцінаўна Мацулевіч - «Ці так страшна тое, чаго мы не разумеем?»; Дар'я Алегаўна Касякова - «Выкарыстанне нетрадыцыйных гістарычных крыніц на ўроках гісторыі»; Вольга Анатольеўна Жыткая з тэмай «Адваротны бок аднаго ўрока, ці як прыцягнуць спадарожны вецер у ветразі». Педагогі знаёмілі ўдзельнікаў семінара з актыўнай ацэнкай з дапамогай пагружэння ў тэму, міні-ўрокаў і глыбокай рэфлексіі адносна выкарыстаных стратэгій.
Другі дзень семінара прайшоў на базе гімназіі № 14 г. Мінска, дзе Марыя Іванаўна Гарохава , дырэктар гімназіі, пазнаёміла гасцей з установай адукацыі, настаўнікі і навучэнцы розных класаў паказалі на сцэне інсцэніроўку ўрока, аб'яднанага скразной тэмай «Экалогія».
Госці змаглі акунуцца ў каларыт народнай музыкі падчас выступлення Заслужанага аматарскага фальклорнага калектыву «Дударыкі» і пазнаёміцца з яго знакамітым кіраўніком Дзмітрыем Дзмітрыевічам Ровенскім.
Педагогі з Расіі высока ацанілі свой удзел у семінары «Актыўная ацэнка як новая стратэгія навучання», а таксама навукова-метадычны ўзровень яго правядзення. Спадзяемся на далейшае плённае супрацоўніцтва.
Інфармацыя са старонкі Акадэміі паслядыпломнай адукаццыі
Відэа YouTube канал Nastaunik.info