Кожнае медыя па-свойму падае навіны аўдыторыі. Прапануем вам медыяадукацыйнае практыкаванне, заснаванае на нядаўнім інфаповадзе – адкрыцці помніка Тадэвушу Касцюшку ў Мерачоўшчыне (Беларусь) 12 мая.
Алена Палейка, метадыст Нацыянальнага інстытута адукацыі, прапануе выканаць з вучнямі медыяадукацыйнае практыкаванне “Помнік як навіна”, каб навучыць вучняў разумець прычыны адрозненняў медыярэпрэзентацый адной і той жа падзеі.
Абсталяванне: фатаграфія помніка, які нядаўна адкрылі, скрыншоты публікацый аб адкрыцці помніка ў розных выданнях. Асобна – загалоўкі і цалкам публікацыя. Урок разлічаны на 45 хвілін (класная гадзіна, урок), або ёсць скарочаная версія на 20 хвілін – інфармацыйная гадзіна.
Cкрыншот загалоўка навіны
Cкрыншот загалоўка навіны
Cкрыншот загалоўка навіны
Cкрыншот загалоўка навіны
Этапы практыкавання “Помнік як навіна”:
1. Мазгавы штурм:
Настаўнік паказвае фота новага помніка і прапануе ўдзельнікам даць яму сваю назву, асабліва цікава, калі ўдзельнікі бачаць яго ўпершыню і нічога пра яго не ведаюць. Усе ідэі запісваюцца на дошцы.
2. Праца ў парах. Абмен меркаваннямі па наступных пытаннях.
1. Каму гэты помнік? (пра што нам распавядаюць дэталі: сімвалы, адзенне?)
2. Якую гісторыю распавядае помнік?
3. Хто і пра што тут напамінае?
4. Якія каштоўнасці перадае помнік? Ці адпавядае гэта вашым каштоўнасцям?
5. Якую функцыю мае помнік у грамадскай прасторы?
6. Дазволілі б вы ўсталяваць гэты помнік, каб былі мэрам горада? Чаму?
3. Кароткая інфармацыя трэнера пра помнік (назва помніка, дзе і калі ён усталяваны, ініцыятар мемарыялізацыі).
Вучні звяртаюцца да вынікаў мазгавога штурму і працы ў парах, адказваюць на пытанне настаўніка: “Як вы лічыце, ці будуць адрознівацца паведамленні пра ўсталяванне помніка ў розных медыя? Чаму вы так лічыце?”
4. Групавая праца з загалоўкамі публікацый аб адкрыцці гэтага помніка
Кожная група атрымлівае аднолькавыя наборы выразак загалоўкаў і назваў выданняў, у якіх матэрыялы былі апублікаваныя. Удзельнікі суадносяць загаловак і выданне, дзе выйшла публікацыя, і тлумачаць чаму яны так лічаць. Вынікі работы групы афармляюцца на асобным лісце як калаж.
5. Абмеркаванне вынікаў групавой работы.
Удзельнікі параўноўваюць калажы, вылучаюць супадзенні і адрозненні, выслухоўваюць каментары адзін аднаго. Настаўнік раздае групам пакеты скрыншотаў публікацый і праводзіць іх выніковае абмеркаванне.
6. Рэфлексія. Напрыканцы ўдзельнікі выказваюць сваё стаўленне, заканчваючы сказ:
• Я сёння быў здзіўлены тым, што…
• Я быў усцешаны, таму што…
• Я быў засмучаны, расчараваны, таму што …
• Я хачу сказаць ...
Больш напрацовак і інструментаў для настаўніка па тэме медыяадукацыйных урокаў “Помнік як навіна” – тут.